الحياة والمجتمع

كيف ازيد فرصتي في الحصول على وظيفة؟ فين اقدم بالمدينة ..

معكم البلوقر i.stazia

في مرحلة ما كانت كل تدوينات عن الدراسة و الجامعة 😅

الحين كبرنا وكبرت تجاربنا و جا دور نتكلم عن مواضيع الكُبار 🤭

الوظايف وما ادراك ما الوظايف.. في زمن زادت فيه صعوبة الحصول على وظيفة و زاد التنافس بالمؤهلات وعدد المتقدمين، بالموازي زادت سرعة الوصول للمعلومة و الاعلانات، وسهلت اجراءات التقديم..

فهالتدوينة باشارككم بعض الطرق المفيدة، الذكية، والسريعة للحصول على وظيفة باسرع وقت بمشيئة الله

السعي من عندنا و الرزق والتوفيق من عند ربنا.. الأكيد انو ربي مايضيع تعب أحد وكل تأخيرة فيها خيرة والعوض حيكون جميل جداً .. نفس الموضوع اتكلمت عنه بفيديو يوتيوب

بسم الله نبدأ ✨

أولاً: على افتراض انك مجهزة سيرتك الذاتية بطريقة احترافية و كاملة 👍🏼

ومستعدة لمقابلة العمل ومافي اي توتر وعندك اجابات نموذجية وكلو تمام 😎

🌸 مهم نجهز رسالة ايميل منمّقة في عنوانها اسم الوظيفة و اسمك

(تقديم وظيفة معلمة لغة انجليزية – فلانة الفلاني)

و نكتب داخلها رغبتنا بالتقدم للعمل في منشئتكم المرموقة ( اكتبي اسم الشركة عشان مايعتقدون انها رسالة نسخ لصق لجميع الجهات 🤭)  والانضمام لفريق عملكم الرائع، وتبادل خبرتي المتواضعة مع خبرتكم العريقة. وارفقي سيرتك الذاتية بصيغة بي دي اف، واختمي الرسالة باسمك.

🌸 حددي المسمى الوظيفي و صفات الوظيفة الي تبغين تتوظفين فيها.. هل تقبلين بمدينتك فقط أو خارجها كمان؟

هل تبغين شيء ميداني أو مكتبي ؟

هل تقبلين بالعمل المختلط؟ هل عندك مشكلة مع دوام الفترتين؟

جاوبي على الأسئلة وحددي هدفك ورغبتك/ برضو حددي الأماكن الي تبغين تتوظفين فيها و عندها المسمى الوظيفي الي مؤهلاتك تناسبة.

(مثلاً: الممرضة بتحصر اسماء على المستشفيات و العيادات اللي تناسبها/ والإدارية بتحصر المؤسسات والمراكز و البنوك ووو )

سار عندنا الايميل جاهز و مرتب ؟

🌸 حلو، الآن نبحث عن حسابات اعلانات الوظائف في مدينتنا

لأهل المدينة هذي الحسابات اللي فادتني الله يكتب اجرهم :

وظائف المدينة المنورة

وظائف المدينة ٢

وظائف المدينة ٣

قناة وظائف المدينة على التليجرام

و تطبيق توطين كمان لكل المملكة 👍🏼

…..

🌸 وظيفتنا هالفترة كل يوم نفتح ونشوف الوظايف الجديدة اللي تناسبنا و نقدم عليها، لأننا مجهزين كل شيء ماراح ياخذ مننا ١٠ دقايق أول اليوم، ارسليها و اسالي ربي التوفيق و خلي جوالك معك فأي لحظة ممكن يجيك اتصال من الـ HR السعيد 😉

🌸 اطلبي المساعدة الاحترافية من مراكز الموارد البشرية

ابرز المراكز في المملكة هو مركز طاقات، في كل مدينة فيه فرع نساء و فرع رجال، فكرته ببساطة يكون معك مرشد/ة تاخذ بياناتك ومؤهلاتك و تدربك في ورش عمل على مقابلات العمل و الحقوق العمالية و انشاء السيرة الذاتية وهذي الأمور، و تحاول توفّق بينك وبين الشركات المحتاجة لموظفين ” زي الخطابة ” 😅

موقع فرع المدينة نساء هنا 

موقع فرع المدينة رجال هنا

🌸 قولي لأهلك و صديقاتك والناس حولك انك تبحثين عن وظيفة، لو حصل سمعوا عن فرصة توظيف أو ترشيح ممكن يبلغونك، ولأن معظم الشركات تفضّل التوظيف بالتوصية بدل خطوات الاعلان والفرز والمقابلات الطويلة.. خصوصاً لو عدد الشواغر مو كثير.

🌸 اسعي بنفسك، اطبعي سيرتك الذاتية خمسين مره، وروحي لكل شركة و مؤسسة فيه المسمى الوظيفي اللي تطمحين له وقدمي لهم بنفسك، بكل هندمة أنيقة و نفس حلوة واستعداد روحي قدمي نفسك وسيرتك الذاتية حطيها عند الموارد البشرية وقولي لهم انا مستعدة في أي وقت يكون فيه شاغر وظيفي.

لما تروحين بنفسك و يشوفونك هذا يعطي انطباع بالجدية كبير جداً، وخليك جاهزة ممكن فلحظتها يقولون لك مستعدة نسوي مقابلة ؟ 🤓👏🏼

أخيراً مع السعي الجسدي ماتنسون السعي النفسي، الدعاء و الثقة بالله، و الإيمان بوفرة الأرزاق 🤎

بكذا اكون خلصت اللي في جعبتي يا صديقات..

يارب تجون تبشروني قريب بوظايفكم، شاركوني بالتعليقات لو كنتو موظفين كيف كانت طريقة حصولكم على الوظيفة ؟

تابعوني على مواقع التواصل 

INSTAGRAM | YOUTUBE | TIKTOK

السابق
ثلاث وصفات شهيرة للبان كيك
التالي
سياسة الخصوصية مكتوبة وجاهزة لموقعك

اترك تعليقاً